懷抱惜別的心情，對未來回看
向望台灣人佮母語閣再相逢、閣再相會……
 
用母語吟唱，怙台文記持，對《落雨彼日》以後，呂美親行徙佇學者佮詩人這兩款角色的中間，累積十冬的健筆，交出這部《方言歌2070》，是伊繼續譜唱人生的思考、情感佮懷想，引𤆬讀者遙想未來，探聽一陣一陣對宇宙回傳轉來的母語回聲。
 
詩集分做六卷，有延續對歷史、語言的關心，共時間佮眼界攏搝開，釘根本土也展望國際，面對台灣佮國外的現實動靜提出沉靜的自言，也有記錄詩人成做母親，佮囡仔日常的小小說教佮愛語。人生客途暫居的性命痕跡佮感觸，以及透由詩歌走揣佮當代讀者共感、共鳴、共勉的歌詞聲韻，加上數篇台語譯詩的實踐佮挑戰，展現一位研究者不時幼磨的詩心，也表現一位詩人深掘歷史、稽考語文的傳承佮再起造。
 
【專文深情推薦】
吳易叡　成功大學全校不分系暨醫學系人社科合聘副教授
申惠豐　靜宜大學台灣文學系副教授兼系主任
 
◎本作品榮獲國藝會出版獎助